Qanunsuz ağackəsmə halları üzrə cinayət işləri başlanıb

Baş Prokurorluğun Mətbuat xidmətinin Məlumatında bildirilir ki,
Azərbaycan Respublikası Baş Prokurorluğu tərəfindən ətraf mühitin qorunması sahəsində hüquqpozmaların qarşısının alınması, aşkar edilməsi və araşdırılması sahəsində aidiyyəti səlahiyyətli qurumlarla birgə fəaliyyəti davam etdirilir.
Baş Prokurorluğun Cinayət təqibindən kənar icraatlar idarəsi tərəfindən Sabirabad, İmişli, Ağcabədi, Bərdə və Ağdam rayonlarının ərazilərində Ekologiya və Təbii Sərvətlər Nazirliyinin əməkdaşlarının iştirakı ilə aparılmış araşdırma nəticəsində 6 cinayət işi başlanılmışdır.
Belə ki, araşdırmalarla dövlət mülkiyyətində, eləcə də xüsusilə qorunan ərazilərdə, həmçinin bələdiyyələrin mülkiyyətində olan ərazilərdə, habelə meşə fonduna aid olan ağacların qanunsuz kəsilməsi faktları öz təsdiqini tapmışdır.
Qanunsuz ağackəsmə hallarının aidiyyəti vəzifəli şəxslərin vəzifə səlahiyyətlərindən sui-istifadə etməsi nəticəsində baş verməsi müəyyən edildiyindən, faktla bağlı Azərbaycan Respublikası Cinayət Məcəlləsinin 259.1, 259.2.4 (qanunsuz ağac kəsmə) və 308.1 (vəzifə səlahiyyətlərindən sui-istifadə) maddələri ilə cinayət işləri başlanılaraq istintaqın aparılması üçün rayon və şəhər prokurorluqlarına, eləcə də daxili işlər orqanlarının istintaq bölmələrinə göndərilmişdir.

“HAKİMİYYƏT” qəzeti